Қазақстанның ақпарат кеңістігінде жаңа сайт пайда болды
Алматыда Almaty Towers бизнес орталығында Қазақстанның жан-жануарлар дүниесіне арналған сайт таныстырылды, — деп хабарлайды photooner.kz.
Алматы қаласында «Қазақстанның тұмса табиғаты» деп аталатын сайттың таныстырылымы өтіп, осы аттас фотокөрме ашылды. Сайт ғылымға деген қызығушылықты арттырып, Қазақстанның биоалуандығын сақтаудың маңызына жұртшылық назарын аударуды мақсат еткен. Жобаны «EcoForming» экология және білім беру қоры «Шеврон» компаниясының демеушілігімен, сондай-ақ Қазақстанның Зоология институты мен National Geographic Qazaqstan журналының қолдауымен жүзеге асырып жатыр.
Жоба авторларының айтуынша, жаңа сайт интернет пайдаланушыларға Қазақстанның жан-жануарлар дүниесін жақынырақ таныстыруды, аңдар мен құстардың бірегей фотоларын көрсетуді мақсат еткен. Соған орай, әрбір тіршілік иесінің түр-сипаты мен ерекшеліктерін танытатын жоғары сапалы портреттік фототүсірілімдер жасалған. Бұл фотогалерея жобаны дамыту барысында жаңа фотосуреттермен толыға бермек.
«Қазақстанның тұмса табиғаты» уеб-сайты студенттер мен оқушылар үшін, сондай-ақ байтақ еліміздің фаунасын зерттеуге қызығатындар үшін көрнекті әрі бағалы дерекқор қызметін атқаратын болады.
Сайт таныстырылымы аясында «Қазақстанның тұмса табиғаты» деп аталатын фотокөрме ашылып, онда жобаның дерекқорына енгізілген жан-жануарлардың бірегей фотосуреттері жұртшылық назарына ұсынылды. Көрменің ашылу рәсіміне осы жобаға атсалысқан кәсіпқой фотографтар Ерболат Шадраховпен Владислав Якушкин сөз сөйледі. Сонымен қатар көрмеге «Фотоөнер» қоғамдық бірлестігінің мүшелері және Т.Жүргенов атындағы Қазақ Ұлттық өнер академиясының фотоөнер мамандығы бойынша оқып жатқан студенттер мен Принтмедиа технологиялар колледжінің фотограф мамандығында оқып жүрген студенттер қатысты.
Көрме 29 қарашаға дейін жалғасады.
«EcoForming» – елімізде қоршаған ортаны қорғау және экологиялық сауатты арттыру ісіне атсалысуды мақсат еткен қоғамдық қор. Осыған орай негізінен экологиялық оқу-ағарту семинарларын, арнаулы фотокөрмелер мен тақырыптық іс-шаралар өткізумен айналысады.
Ақсая Муттахайқызы, журналист
Суреттерді түсіргендер- Ерболсын Бірлікұлы, Ілияс Асқарбек
