Кеген-достық қақпасы

Шекара еліміздің қамалы іспеттес. Кереге таулы Кеген өңірі шекаралық аймағында, яғни Қазақстан мен Қырғызстан шекарасында «Кеген» өткізу бекеті бар. Мұнымен қоса, өңірде «Қарқара», «Рабат»  және  «Саты»  шекара бекеттерін айта кеткен жөн. Мұндағы қырағы көзді шекарашылар ел тыныштығын күзетіп тұр. «Кеген» өткізу бекетінен жолаушылар, көлік, тауар және жануарларды өткізеді. Бекет Ыстықкөл облысының Түп ауданында орналасқан. Бұл туралы photooner.kz тілшісі хабарлайды. 

Қазақстан Республикасы мен Қырғызстан Республикасы мемлекеті шекарасы жанында, Шекара қызметінің Алматы облысы бойынша Департаменті, Райымбек ауданы бойынша шекара басқармасының «Кеген» шекаралық бақылау бөлімшесі 2001 жылдан бері қырағы көзді шекарашылардың бақылауында. ҰҚК Шекара қызметі Алматы облысы бойынша департаментінің «Кеген» шекаралық бақылау бөлімшесінде енді жолаушыларға тәулік бойы қызмет көрсетіледі. Бұған дейін бөлімше бақылаушылары жұмыс тәртібі сағат таңғы 07:00-дан кешкі 17:00-ге дейін күнделікті режимде жұмыс істеп келген.

Бұл өзгеріс Қазақстан Республикасының «Қазақстан Республикасы Үкіметі мен Қырғыз Республикасы Үкіметі арасындағы мемлекеттік шекарадағы өткізу пункттері туралы 2003 жылғы 25 желтоқсандағы келісімге өзгеріс енгізу жөніндегі хаттаманы ратификациялау туралы» Заңы күшіне енуіне байланысты жүзеге асырылды. Соған сәйкес «Кеген» және көрші қырғыз елінің «Қарқара» өткізу пунктерінің жұмыс тәртібі «күндізгі уақыттан» «тәулік бойына» ауыстырылды.

Осыған орай, екі елдің Шекара ведомстволарының басшылары шекара бойында арнайы кездесіп, жаңа қызметтің тұсаукесер рәсімін өткізді.

Бізде осы тарихи сәттің куәсі болып қайттық. Бұл Қазақстан мен Қырғызстан арасындағы достық пен ынтымақтастықтың жаңа қадамы һәм қазақ пен қырғыз халқының арасындағы мәңгілік достықтың, шынайы бауырластықтың дәлелі.

«Кеген» және «Қарқара» шекаралық бақылау бөлімшелерінің алдында құрмет қарауылы сап түзеп, қос елдің көршілес аудан әкімдері мен қонақтары бір-бірін зор қошаметпен қарсы алды.

Қазақ пен қырғыз ән-күйлері кезекпен шырқалған іс-шарада  қонақтарды қазақтың салт-дәстүріне сай ұлттық киім киген өнерпаздар қарсы алып, арнайы әзірленген дәмнен ауыз тигізді.

Ең алдымен, екі елдің Мемлекеттік Гимні орындалды. Алғашқы құттықтау сөз алған ҚР ҰҚК Шекара қызметі директорының орынбасары, генерал-майор Төлеужан Жүнісов:

-Осы маңызды шараға байланысты, қуанышымды білдіруге рұқсат етіңіздер! Қазақстан мен Қырғызстан жақын, көршілес елдер және сенімді әріптестер. Біздің елдігімізді, арадағы сеніммен ынтымақтастықты нығайтатын тарихи байланыстар, тату көршілік және халықаралық ұйымдарға бірлескен мүшеліктер біріктіреді. Осы арада қатынастардың дамуына куәгер болып отырмыз, соның ішінде достық, туризм және экономиканы нығайтуға үлес қосатын шекарадағы өткізу пункттерін жетілдіру және шекараның тұрақты жұмыстары арқылы екі елдің ынтымақтастығы одан әрі дамитындығына сенім білдіремін,-деді ол.

Абдикарим Алимбаев, Қырғыз Республикасының Мемлекеттік Ұлттық қауіпсіздік комитеті төрағасының бірінші орынбасары, Шекара қызметінің директоры, генерал-майор:

-Құрметті, Төлеужан Сабырұлы! Құрметті бүгінгі іс-шараның қатысушылары! Біріншіден мен, осы бір тарихқа бай, ұйық жер Қарқара жерінде тұрғаныма толқып тұрмын. Баршаңызға белгілі болғандай, жақында екі өлкенің Президенттері жолығысып, көптеген құжаттарға қол қойды. Осылардың бірі Ыстықкөл іргесіндегі «Қарқара» өткізу бекетін 24 сағат жұмыс істеу тәртібіне өткеруіне екі өлкенің басшылары саяси шешім қабылдады. Бұл дегеніміз, екі өлкенің арасындағы достықты, сауда-саттықтарды, экономикалық жағынан туризмді дамыту мақсатында осы қадамға барды,- дей келе қос елдің ынтымақтастығы одан ары дами беретіндігін тілге тиек етті.

-Бүгінгі күн еліміз үшін ғана емес, өңіріміз үшінде тарихи мәнге ие. Осы орайда ауданымыз үшін, тағы бір тарихи сәтті күн болмақ. «Кеген» шекаралық бақылау бөлімшесінде енді жолаушыларға тәулік бойы қызмет көрсетіледі. Бұған дейін бөлімше бақылаушылары тек күндізгі уақытта ғана жұмыс істеп келген болатын. Құрметті қонақтар! Сіздерді ерекше маңызға ие салтанатты шарамызбен шын жүректен құттықтаймын! Бұл ұзақ жылдар бойы күткен қуаныш, сол қуанышты сәттің куәгері болып отырмыз. Екі ел арасындағы ынтымақ пен достықтың  тағы бір жарқын көрінісі. Бұл бастама қос мемлекет басшыларының көрген саясатының нәтижесі. Ел президенті Қасымжомарт Тоқаевпен бауырлас Қырғыз елінің басшылығы қабылдаған шешімдер халықтарымыздың өзара қатынасын жаңа белеске көтеріп отыр. Екі мемлекеттің де тарихы тереңде жатыр. Әйгілі  Қарқара жайлауы ежелден Ұлы Жібек жолының бойындағы маңызды сауда орталығы болған. Сол тарихи дәстүр жалғасын тауып, бүгінгі заман талабына сай жаңғырып отыр. Енді осы шекара арқылы екі ел арасындағы тауар айналымы артып, шағын және орта бизнестің дамуына жаңа серпін бермек,- деген аудан әкімінің орынбасары Медет Исаев ежелден бір-біріне етене жақын қазақ пен қырғыз достығы жыл сайын артып келетіндігін атап өтті.

Одан соң, қырғыз бауырлар Заманбек Нұрқаділов атындағы Кеген ауылының балалар өнер мектебімен Кеген аудандық тарихи-өлкетану мұражай үйінің қызметкерлері дайындаған «Тамыры бір, тағдырлас халық- достықта» атты арнайы көрмені тамашалап, аудан тарихы туралы ақпарат алды.

Ендеше, ежелден ауылы аралас, қойы қоралас өскен, Алатаудың күн­гейі мен теріскейін қоныс еткен қос халықтың тарихи та­мырластығы, бауырластығы ажырамай келе жатқаны баршаға аян. «Қазақ-қырғыз бір туған» дейді қос халық.

Екі елдің облыстарымен аудандары іргелес, демек сауда-саттық, барыс-келіс, алыс-беріс жағынан өте қолайлы орналасқан. Шекара бекеттерінің тәулік бойы жұмыс жасауы, қазақ-қырғыз қарым-қатынасын жаңа белеске көтерері даусыз.

Дәурен ЕРМЕКБАЙ

Кеген ауданы, Алматы облысы